चैत भित्र अपिको ४० करोड रुपैयाँको सेयर आउने, स्थानीयलाई सेयर दिने प्रस्ताव धितोपत्र बोर्डमा

काठमाडौं। चैत भित्र अपि पावर कम्पनीले ४० करोड रुपैयाँको (४० लाख कित्ता) सेयर जारी गर्ने भएको छ । कम्पनीले १० करोड रुपैयाँको (१० लाख कित्ता) सेयर स्थानीय तथा प्रभावित क्षेत्रका बासिन्दाको लागि जारी गर्ने प्रस्ताव धितोपत्र बोर्डमा पेश गरेको छ । कर्मचारी तथा अन्य सर्वसाधारणलाई कम्पनीले ३० करोड रुपैयाँ (३० लाख कित्ता) सेयर जारी गर्ने भएको हो ।

हामी स्थानीय र सर्वसाधारण दुवैलाई चैतसम्ममा सेयर जारी गरिसक्ने लक्ष्य लिएका छौं, कम्पनीका कार्यकारी अध्यक्ष गुरुप्रसाद न्यौपानेले भने। कम्पनीको सेयर बिक्री प्रबन्धकमा एनआइबीएल क्यापिटल मार्केट्स लिमिटेड रहेको छ । 
 

पहिलो चरणमा कम्पनीले स्थानिय तथा प्रभावित क्षेत्रका बासिन्दाको लागि सेयर जारी गर्ने भएको हो । स्थानिय तथा प्रभावित क्षेत्रका बासिन्दाको लागि छुट्याइएको मध्ये दुई लाख कित्ता सेयर दार्चुला जिल्लाको बेथला, धुलिगडा, रानी शिखर तथा शिखर गाविसका सबै वडा र बैतडी जिल्लाका रुदे्रश्वर गाविसका सबै वडाका बासिन्दाको लागि जारी हुने छ । बाँकी आठ लाख कित्ता सेयर दार्चुला र वैतडीका अन्य गाविस र सेती अञ्चलका पाँच जिल्लाका बासिन्दाको लागी जारी गरिने छ ।
 

कम्पनीको हाल अधिकृत पुँजी एक अर्ब २० करोड रुपैयाँ, जारी पूँजी एक अर्ब रुपैयाँ रहेको छ । जारी पूँजी मध्ये हाल चुक्तापूँजी ६० करोड रुपैयाँ रहेको छ । स्थानिय र सर्वसाधारणलाई सेयर निष्कासन गरेपछि चुक्तपूँजी एक अर्ब रुपैयाँ पुग्ने छ । 
 

हाल कम्पनीले दार्चुला र बैतडी जिल्लाको सिमानामा रहको नौगढ गाँड आयोजना निर्माण गरिरहेको छ । आयोजनाको करिब ६० प्रतिशत काम सम्पन्न भइसकेको छ, न्यौपानेले बताए । यो आयोजनाको पूर्ण क्षमता ८.५ मेगावाट रहेको छ । न्यौपानेले यो आयोजनापछि अपर नौगढ गाँड आयोजना पनि निर्माण गर्ने बताए । दोस्रो आयोजनाको भने आठ मेगावाट क्षमता रहने छ । 
 

अपि पावरको संस्थापकमा साउथ एसिया इन्जिनियरिङ कम्पनी, अरुणभ्याली हाइड्रोपावर र न्यौपाने समूह रहेको छ ।सुदुरपश्चिम क्षेत्रमा जलवद्युत् आयोजनाको बिकास गर्ने अपि पावर कम्पनी पहिलो नेपाली निजी क्षेत्रको कम्पनी भएको न्यौपालेले दाबि गरे । bizmandu

१३ वटा कम्पनीले सञ्चालन अनुमति माग गर्दै आवेदन, पुँजी बृद्धि गरेर लाइसेन्स दिने योजना

काठमाडौं । नियामक निकाय बिमा समितिले नयाँ बिमा कम्पनीहरुलाई सञ्चालन अनुमति दिन छलफल थालेको छ । समितिले करिव छ बर्षदेखि नयाँ बिमा कम्पनी सञ्चालन अनुमति दिन बन्द गरेको छ ।

लामो समयदेखि नयाँ कम्पनीहरुलाई सञ्चालन अनुमति दिन बन्द गरेका कारण समितिलाई पनि लाइसेन्स खुलाउन चौतर्फी दवाव पर्दै आएको छ । यही दवावकाबीच समितिले नयाँ कम्पनी खोल्न दिने बारेमा छलफल थालेको हो । आठ जीवन र पाँच गैरजीवन बिमा कम्पनी सञ्चालन गर्न अनुमति माग्दै समितिमा आवेदन दिएको छ बर्ष नाघिसकेको छ । 

‘नयाँ कम्पनीहरु खोल्न दिँदा के हुन्छ, कस्तो मापदण्ड बनाउँदा ठीक हुन्छ भनेर मैले आफ्ना सिनियर व्यवस्थापनका कर्मचारीहरुसँग राय मागेको छु,’ समितिका अध्यक्ष प्रा. डा. फत्तवहादुर केसीले भने, ‘पुँजीको आधारमा मात्र लाइसेन्स दिँदा धेरै कम्पनी आउन सक्छन् । सबै कुरा विचार गर्नु पर्ने हुन्छ ।’

बिमा समितिमा यसअघि नै १३ वटा कम्पनीले सञ्चालन अनुमति माग गर्दै आवेदन दिइसकेका छन् । कारोबार अनुमति माग्नेमा जीवन बीमातर्फ सिटिजन्स्, स्टार, सन नेपाल, रिलायवल, रिलायन्स, आईएमई, स्ट्यान्डर्ड र सानिमा लाइफ इन्स्योरेन्स कम्पनी छन् ।

गैरजीवन बिमा कम्पनीतर्फ आइडल, जनरल इन्स्योरेन्स, अजोडा, मनकामना र सानिमा जनरल इन्स्योरेन्स कम्पनीले समितिमा आवेदन दिएका छन् ।

आवेदन दिएका १३ कम्पनीमध्ये तीन वटाले पुँजी बृद्धि गरेर भए पनि तत्काल लाइसेन्स दिनु पर्ने भन्दै लविङ गर्न नै थालेका छन् । एउटा भरपर्दो मापदण्ड तयार पारेर भएपनि लाइसेन्स दिनु पर्ने लविङमा गैरआवासीय नेपालीहरुको समूह र देशकै दुई व्यवसायिक घराना लागेका छन् । 

समिति पनि पुँजी बृद्धिका साथै केही विशेष व्यवस्था गरेर अनुमति दिने पक्षमा छ । लाइसेन्स खुलाउँदा एकैचोटी धेरै कम्पनीले पाउन सक्ने भन्दै समितिले विशेष मापदण्ड तयार पारेर त्यसमा उत्तिर्ण हुनेलाई मात्र सञ्चालन अनुमति दिनु पर्ने समितिका अधिकारीहरुको राय छ ।

समितिले नयाँ ऐनको मस्यौदामा उल्लेख भएजस्तै नयाँ इन्स्योरेन्स कम्पनीलाई त्यसैका आधारमा पुँजी तोकेर लाइसेन्स दिने योजना बनाएको छ । मस्यौदामा जीवन बिमा कम्पनीका लागिा दुई अर्ब र गैरजीवन बिमा कम्पनीका लागि एक अर्ब रुपैयाँ पुँजी तोकिएको छ ।

अहिले गैरजीवन बिमा कम्पनीको पुँजी २५ करोड र जीवन बिमा कम्पनीको पुँजी ५० करोड रुपैयाँ छ । पुरानै व्यवस्था अनुसार बिमा कम्पनीहरुले समितिमा आवेदन हालेका हुन् । समितिले नयाँ मापदण्ड तयार पारेपछि पुँजी संरचना परिवर्तन गरेर कम्पनीहरुले आवेदन दिनु पर्ने हुन्छ ।bizmandu

नेप्से परिसूचक स्थिर, बीमामा लगानी बढ्यो, बीमाको आठ करोड बढि रुपैयाको सेयर कारोबार

काठमाडौं। कारोबार खुलेदेखि बढ्ने क्रममा देखिएपनि नेप्से परिसूचक लगभग स्थिर रह्यो। नेप्से परिसूचक ०.४७ अंकले बढेर ९२३ मै रह्यो। कारोबार अवधिमा करिब आठ अंकसम्म बढेको नेप्से पछि घटेको हो। तुलनात्मक रुपमा बीमा कम्पनीमा लगानीकर्ताहरुले लगानी बढाइरहेका देखिन्छन । यो क्षेत्रका कम्पनीमा मात्रै आठ करोड ७६ लाख रुपैयाँको कारोबार भएको छ । २१ कम्पनीमा विहीवार यति रकमको लगानी भएको हो । यस दिन २५ करोड ५८ लाख रुपैयाँ कुल कारोबार भएको छ । 

पुँजी बढि तोकेर भएपनि नयाँ बीमा कम्पनीलाई अनुमती दिने बिषयमा बीमा समितिमा छलफल चलेको समाचार पछि यो क्षेत्रमा लगानीकर्ता आकर्षित भएका हुन । पूँजी वृद्धि गरेर नयाँलाई अनुमती दिदा पुरानालाई पनि निश्चित समयपछि पुँजी वृद्धि गराउन लगाउनेछ भन्ने अपेक्षामा लगानीकर्ता देखिएका छन । तर हाल भने नयाँ कम्पनी खोल्न दिने बिषयमा छलफल मात्र भएको हो । 

वाणिज्य बैंकमा २४ कम्पनीको सर्वसाधारण र दुईको संस्थापक समूहका सेयर कारेबार भएको छ। यो समूहले सबैभन्दा धेरै रकम (१० करोड २५ लाख रुपैयाँ) तान्यो। यो समूहको परिसूचक भने २.४३ अंकले घटेको छ। क बर्गमा रहेका कम्पनीहरुको कारोबार मापक सूचक सेन्सेटिभ परिसूचक पनि बढ्न सकेन। 
 

२० प्रतिशत बोनस सेयर र त्यसपछि ३० प्रतिशत हकप्रद सेयर दिने घोषणा गरेको लक्ष्मिले पनि लगानी तानेको छ। बैंकको एक करोड ७३ लाख रुपैयाँको सेयर कारोबार भएको छ। बैंकले यसअघि २५ प्रतिशत हकप्रद सेयर दिने निर्णय गरेको भएपनि त्यो निर्णय फेरेर ३० प्रतिशत दिने भएको हो। 
 

बागमती डेभलपमेन्ट बैंकले पनि १०.५३ प्रतिशत नगद लाभांश दिने निर्णय गरेको नेप्सेमा सुचना छ। एक सय ४१ कम्पनीको यस दिन सेयर कारोबार भएको छ । बैंकिङ, वित्त कम्पनी र उत्पादन मुलक समूहको परिसूचक घटेको छ। bizmandu

लक्ष्मी बैंकले २० प्रतिशत बोनस र ३० प्रतिशत हकप्रद शेयर दिने प्रस्ताव, कार्तिक २५ मा साधारणसभा

लक्ष्मी बैंकले लगानीकर्तालाई गत बर्षको खुद नाफाबाट २० प्रतिशत बोनस शेयरको प्रस्ताव सहित कार्तिक २५ मा साधारणसभा गर्ने निर्णय गरेको छ । 

बैंक संचालक समितिको १ सय ५५ औं बैठकले २० प्रतिशत बोनस शेयर दिने प्रस्ताव गर्दै बैंकको १४ औं साधारणसभा कार्तिक २५ मा गर्ने निर्णय गरेको हो । यसअघि बैंकको १३ औ  साधारणसभाले २५ प्रतिशत हकप्रद शेयर जारी गर्ने निर्णय गरेकोमा आगामी साधारणसभामा त्यसलाई संशोधन गरी ३० प्रतिशत हकप्रद शेयर जारी गर्ने प्रस्ताव लगिने निर्णय पनि गरिएको छ । 

 बैंकको गत आर्थिक बर्षको अन्त्यसम्म चुक्ता पूँजी १ अर्ब ९४ करोड र प्रति शेयर आम्दानी २२ रुपैयाँ रुपैयाँ रहेको छ । 

Mero Lagani 
Oct 16, 2014

कुमारी बैंकको साधारणसभा कार्तिक २६ मा, ३३ प्रतिशत बोनस र मर्ज मुख्य ऐजेण्डा

कुमारी बैंकले आफ्नो चौथो साधारणसभा आगामी कार्तिक २६ मा आयोजना गर्ने भएको छ ।  

साधारणसभामा बैंकको संचालक समितिले प्रस्ताव गरेको ३३ प्रतिशत बोनस शेयर वितरण र कम्पनीलाई मर्ज वा एक्विजिशनमा लैजाने प्रस्तावबारे मुख्य रुपमा छलफल हुने जनाईएको छ । बैंकको साधारणसभा प्रयोजनका लागि कार्तिक ५  गतेदेखि कार्तिक २६ गतेसम्म शेयरधनी दर्ता किताव बन्द हुने छ । कार्तिक ४ गतेसम्म शेयर किनी नामसारी गराउने लगानीकर्ताले ३३ प्रतिशत बोनस शेयर र साधारणसभामा भाग लिने अबसर पाउने भएका छन् । 

 

नेपाल राष्ट्र बैंकले तोकेको अनिवार्य पूँजी सिमा २ अर्ब नपुगेकोले बैंकले जगेडा कोष समेत उपयोग गरी बोनस शेयर दिएर पूँजी बृद्धि गर्न लागेको हो । कुमारी यस बर्ष सबैभन्दा धेरै बोनस शेयर प्रस्ताव गर्ने दोस्रो बाणिज्य बैंक हो । कुमारीलाई उछिन्दै एनसीसी बैंकले ३७ प्रतिशत बोनस शेयर प्रस्ताव गरेको छ । 

 

Mero Lagani 
Oct 15, 2014

सानिमा बैंकको दशौ साधारणसभामा १५ प्रतिशत बोनस पारित, पूँजी २ अर्ब ५५ करोड पुग्यो

सानिमा बैंकको बिहीबार राजधानीमा भएको दशौ साधारणसभाले १५ प्रतिशत बोनस शेयर दिने प्रस्ताव पारित गरेको छ । गैर आवासीय नेपालीहरु पनि प्रर्बद्धक  रहेको बैंकको पूँजी अब २ अर्ब २१ करोडबाट २ अर्ब ५५ करोड रुपैयाँ पुगेको छ । 

बैंकको साधारणसभामा बोल्दै अध्यक्ष  विनय कुमार श्रेष्ठले बैंकले अघिल्लो आर्थिक बर्षको तुलनामा आर्थिक वर्ष २०७० / ०७१ मा ४० प्रतिशतले मुनाफा बृद्धि गरी ४२ करोड ७६ लाख ९५ हजार खुद मुनाफा गर्न सफल भएको बताउनुभयो ।। बैंकले भिसा ब्राण्डका कार्डहरु जारी गर्ने र नविनतम कोर बैंकिङ प्रणाली   खरिद गरि सेवालाई प्रभावकारी बनाउने लक्ष्य रहेको अक्ष्यक्ष  श्रेष्ठले बताउनुभयो ।

 

आर्थिक बर्ष २०६९/०७० मा करिब १७ अर्व ७९ करोडको निक्षेप संकलन गरी १५ अर्वको कर्जा प्रवाह गरेको बैंकले आर्थिक वर्ष २०७०/०७१ मा करिब २४ अर्व ८७ करोडको निक्षेप संकलन गरी  २० अर्व बराबरको कर्जा प्रवाह गरेको जनाएको छ ।  बैंकले हाल ३७ शाखाबाट सेवा प्रदान गदैं आएको छ ।

Kailash Khadka 
Oct 16, 2014

ईन्द्रेणी आकार बनाएर बन्द भयो महिनाको अन्तिम दिनको शेयर कारोबार, नेको र लक्ष्मीमा पर्यो धेरै चाप

नेपाल स्टक एक्सचेन्जमा बिहीबार भएको शेयर कारोबार मध्यसमयसम्म उत्साहजनक भए पनि अन्त्यमा सकात्मक विन्दु मात्रमा टेकेर बन्द भयो ।

कारोबारको मध्य समयसम्म लगातार बढेको  नेप्से त्यसपछि घट्दै गई अन्त्यमा ०.४७ अंकले सकारात्मक भई ९२३.५९ मा बन्द भयो । कारोबार रकम पनि अघिल्लो दिनको तुलनामा झण्डै ३ करोडले कमी आई २५ करोड ५८ लाख मात्र भयो । 

 

अधिल्लो दिन नेको ईस्योरेन्सको संस्थापक शेयर उपेन्द्र महतो समूहले खरिद गरेको समाचार बाहिर आएपछि सो कम्पनीको शेयर मूल्य १० प्रतिशतले बढेर सर्किट लागेको छ । बजार बन्द हुने बेलामा पनि सो कम्पनीको शेयर खरिद गर्न ६ हजार कित्ताको माग बांकी नै थियो । 

 

त्यसैगरी मेट्रो बिकास बैंक, फेवा फाईनान्स र सिद्धार्थ विकास बैंकका शेयरहरु पनि उच्च अंकले बढे । लक्ष्मी बैंकले २० प्रतिशत बोनस र ३० प्रतिशत हकप्रद शेयर दिने प्रस्ताव गरी कार्तिक २६ मा साधारणसभा गर्ने निर्णय सार्वजनिक गरेपछि त्यसको मूल्य बढ्नुका साथै सबैभन्दा धेरै रकम १ करोड ७३ लाख बराबरको शेयरको कारोबार भयो । त्यसैगरी नेशनल लाईफ ईन्स्योरेन्स, कुमारी बैंक, नेको ईन्स्योरेन्स, प्राईम लाईफ ईन्स्योरेन्स र एशियन लाईफ प्रत्येकका १ करोड रुपैयाँ भन्दा बढीको शेयर कारोबार भयो । 

 

अर्कोतर्फ मल्टिप्रपोज फाईनान्स, नारायणी नेशनल फाईनान्स र जानकी फाईनान्सका शेयर मूल्य सबैभन्दा धेरै प्रतिशतले घटे । महिनाको अन्तिम दिनको कारोबार सकारात्मक विन्दुमा अडिएर बन्द भएको छ भने अघिकांश समूह सूचकहरु सकारात्मक रहेका छन् । Mero Lagani 

Oct 16, 2014